2008.09.30 陰天
今次都好好彩, 也於出發前已搞掂好演唱會飛....
但亦都因為演唱會後就要接著繼續十日北海道之旅,
所以預算唔多, 最終只能購買到對正前/後台的二階第五列位置~
也鑑於預算問題, 而且今年把中居扇, 老實講, 真係買唔落手....
所以我決定自備POP UP!中居扇及手燈去日本赴會啦~
因今次行程與琳媽同行, 所以未能全日於Tokyo Dome Stand By~
當日上午先帶了琳媽去吉祥寺行下, 再於酒店休息一會~
1700由池袋再出發~
約1730才到達Tokyo Dome, 一出車站門口, 天色已開始轉黑~
首先看到的, 是GATE 25前的GOODS販賣檔, 竟然唔駛排隊喎~
雖然知道時間緊迫, 但因本身只決定買場刊及FILE兩樣野,
見咁情況, 即時決定先撲入搜購, 果然不消5分鐘, DONE!!!!!
順著人潮, 不知是否越來越接近開場時間, 每個入口都需要排隊入場~
仲要係打哂蛇餅個隻.......真係未試過!!
GATE 40都唔例外, 等入場的人潮足足塞滿了Tokyo Dome兩層樓梯~
一邊排隊, 一邊看著手錶, 一邊擔心會唔會遲入場呢~
幸好, 順利於六點前入到去~
一邊等待開場時, 一邊心諗: 死啦!! 其實二階會唔會唔企起身0架????
等待期間, 突然聽到arena起哄, 應該有明星黎睇~
因太遠, 隱約見到其中一位男士係長頭髮, 我諗應該係SAMさん黎睇吧...
不消一會, 全場熄燈, 叫聲此起彼落, 演唱會要開始啦~
而我的憂慮當然都係白費啦,
因為周遭所有人原來已比我更先企起身等開場啦~
*因呢兩年來, 小琳的記憶體都無咩UPGRADE過, 所以係記憶方面,
尢其處於激烈情況下, 絕對會有斷片情況出現, 如有任何錯漏, 不便之處,
敬請原諒。*
●如往時一樣, 先播放短片。
一開始, 一男一女的小朋友前往類似古堡的地方探險(?)
點知遇上五位(隻?)吸血鬼, 於舞台上, 模仿著木偶般地表演.....
●隨著theme of 019響起,
大電視出現了他們五人被"夾"夾住的動畫公仔....
夾夾下, 就係大電視中央位置夾出左五位型男出來啦~~哈哈!!!
* 琳媽語錄1: 嘩, 二樓都好震下喎!!!*
●戴著黑色粗邊眼鏡, 穿著紅色格仔西裝的五人從電視斜台行落黎,
用"弾丸ファイター"作為序曲~
●點解唔戴耐d個粗邊眼鏡喎, 咁靚仔!!
●咁high 0既情況, 當時唔少得BANG!BANG!バカンス!啦~
今次木村竟然唔咀慎吾, 反而咬住慎吾指住佢個隻手指唔放~
即刻諗起Bistor smap入面個隻鰐魚木村, 哈!!!
●又再有短片~
今次呢五隻戴左彊屍假牙0既吸血鬼, 又嚇親兩位小朋友啦~
為左補償佢地, 五人決定做表演比佢地睇~
而小朋友想睇0既表演就係 - 有型的dance!!!!
* 琳媽語錄2: 今年個電視好清喎, 我仲以為我老花添, 哈哈~*
●棺材出場啦~ 真係夠大吉利是啦~
五位當然於棺材中彈出~
今次終於著番套黑色吸血鬼裝, 型!!
●呢part主要係將舊歌換上新編曲~ $10啦, 青いイナズマ啦, 仲有Lion heart~
唱之前真係完全聽唔出係咩歌, 不過我好鐘意呢一part, 好有新鮮感!!!
●唱Lion heart仲出動到士的添, 士的舞型型型!!!
●再有印象已經係MC時間, 真係聽唔哂~
總之呢日主角係阿剛, 一開始已唔知講錯D咩激嬲木村,
好似話佢煮過某一樣野掛.......但木村極力地否認~
之後又話中居整過"野球飯團", 唔知係咪講01年個罰GAME入面個個呢??
中居又係極力地否認~
跟住又丟低阿剛係台中心, 四個企埋一邊花道睇住佢, 仲叫人熄左台中心D燈~
但呢隻傻剛又唔知做咩, 愈行愈過, 最終企左去另一邊花道,
仲問四個做咩離佢咁遠, 跟住四隻就話佢"係你自己越行越遠之嘛"~
跟住傻剛突然係佢個邊花道加速跑去另一邊花道, 仲以為佢會打跟斗,
點知中途甩鞋, 真係醜死怪~
●因是日MC慎吾同吾郎都無咩參與地方,
所以兩人好快就擺好下首歌POST等佢地三隻~
三隻玩完後就接著この瞬間、きっと夢じゃない, 尾段仲有播D運動員奧運片段。
●再再有印象就係吾郎同木村SOLO~
●首先吾郎SOLO, 唔知點解今年個feel同吾郎00年首solo好似~
可能又係暗紅色西裝同淨係得女dancer掛~
但今年都好對唔住吾郎, 首先第一次聽呢首歌已覺得好怪,
同吾郎都唔0岩key0既......唔鐘意!! 所以真係集中唔到精神去睇, sorry~
●立即接著就係木村solo, 歌唔駛講啦~ 但點都要讚木村D章魚舞真係幾得喎~
●間場後, 波波衫終於出場啦~
白色底西裝加上粉紅色波波!!!姣震!!!
不但木村表演劍插西柚(?), 仲有中居表演瞬間轉移"娛賓"~
●阿剛SOLO同上年一樣, 一樣有"動作教學"~
其中還包括裕介同去緊廁所的慎吾, 哈哈~
而現場, 四位兄弟就換上螢光西裝, 同阿剛伴舞~
●突然唔見了中居, 知道之後一定係佢0既solo~
06年現場睇唔到, 餓了兩年0既solo, 終於有得睇啦~
中居退場後, 另外四個就戴住headphone, 騎著Segway通場飛,
唱我全碟最唔鐘意個首ココロパズルリズム........
●終於等到佢地唱完啦~
大電視播出私は貝になりたい的片段, 但其實都係個兩段預告片~
而且出奇地係正經版, 完全沒有惡搞成分~
* 琳媽語錄3: 嘩, 中居扮史迪仔喎~*
●一開始, 台中心出現了以中居為首的"千手觀音"~
雖然唔係好齊, 但尚算ok啦~
終於見到史迪仔中居真身, 頭戴皇冠, 手戴手抓手套,
反而我覺得佢似小王子多dd~嘻嘻!!
中居企左係大台個兩層蛋糕上跳舞,
全場不停地與中居對唱"YEAH", "JOKE", "JUMP"~
一嗌完"JUMP", 全場靜哂, 中居同所有DANCER都訓哂係個台度~
呢隻中居即係訓係度話, "我今年36歲啦, 真係好容易累呀......"
"你估好似你地咁呀, 得閒就揮下扇, HEY! HEY!咁呀, 我真係要跳足全場0架~
真係好累0架~" 呷左一輪之後, 佢就除左佢頂皇冠同拉開哂D衫鈕完成埋首歌啦~
●但唔好以為咁就完啦~
最後SXS惡魔人入面個"お父さん"點都要出黎惡搞一番先肯收場~真係!!!
* 琳媽語錄4: 隻衰野(意指中居)今年唱歌好聽左好多喎~*
●之後就精彩啦~
我入場之前都真係唔知有呢一Part!!!
一開燈, 竟然有一座鋼琴, 而負責彈琴的竟然係阿剛!!!嘩~~~
但睇佢可能好緊張, 手都震埋.....而且仲甩哂音, 吾郎差唔多要清唱咁滯~~~
唔知真係隊Band會係某個時間一齊"入", 定係見到阿剛甩得太犀利提早"入"......
好快就Full Band演奏番あなたのためにできること~
●估唔到會由木村彈結他唱夜空のムコウ, 五個企係台中個兩層蛋糕度唱, 正~
但見到中居個頂孖辮冷帽, 真係睇見都熱呀~
既然已經有結他係手, 當然要接住唱そのまま啦~
* 琳媽語錄5: 嘩......咁熱戴住頂冷帽, 會唔會生蝨0架??*
●台中突然多了好多小朋友, 同SMAP一齊唱世界に一つだけの花~
唱完後好正常熄燈啦, 但唔知係咪因為實在太多小朋友啦,
好耐都未返得哂入後台, 木村同阿剛就殿後, 慢慢帶番佢地入去~
阿剛仲不停地叫小朋友要小心樓級添~
●萬眾期待的慎吾SOLO終於到啦, 首先拎住士的著白色西裝慎吾出黎~
但不知是否自己期望過高, 定係慎吾隻腳真係太傷, 不能過分郁動....
慎吾主要都係企係蛋糕頂度唱歌....唔, 有少少失望囉........
●跟住五個換左類似私服, 介紹Band成員~~
●突然出現Sexy And The City, 原來今年都有Lucky San~
好似一個2階, 兩個1階, 一個arena D同一個arena B......好心比多d stand啦........
●終於到我最期待的時候啦~
因太遠啦, 一開始我淨係見到中居係左邊, 木村係右邊~~
到差唔多去到後台先見到原來係中居, 剛, 慎吾係左邊, 木村同吾郎係右邊~
但佢地唱咩歌我已經唔記得啦~
因個腦淨係記得自己狂嗌中居!!!慎吾!!!中居!!!慎吾!!!中居!!!慎吾!!!中居!!!慎吾!!!
而呢兩位都好合作, 都叫做有向二階stand打下招呼~
●最後SMAP返回前台, 由電視斜台上番大電視中間~
Encore左一次之後就正正式式完結啦~
完成旅程後, 排隊出門口~
點知原來出面已經傾盆大雨, 真係同前年一樣咁大雨~
上次就大雨下排隊買GOODS, 今次就排隊入車站搭車~~
最終都係全身濕哂, 但唔同的就係今年D GOODS無濕, 因實在太少野啦~哈哈~
拜拜啦~ Tokyo Dome~~ 希望好快可以再黎會你啦~~^^
留言列表