小琳無限公司

01.10.2008  水曜日  陰

經過昨晚的辛勞...
今天也是準時9點正出發哦!!
而首站我便準備帶琳媽去下北澤~
因上次去過, 超鐘意呢個地方, 話過下次一定要帶佢去行下~

我們首先於池袋出發到涉谷, 之後再要轉井之頭線......
轉車前, 當然先搵早餐食下先啦~
在車站附近行下搵下, 周遭唔係吉野家就松屋.....悶!!
再行下, 見到好多香港人都好鐘意食個間蝦包店, 一於入內試下!!

但入到埋counter先發現, "0車, 蝦包咪又係炸野~"
所以都係唔好啦~ 芝士火腿牛角包set吧!!!
新鮮出爐, 熱辣辣, 個包面仲有少少脆, 火腿都係熱0架~
如果香港麥記有整得咁好食, 我真係日日食都制呀~

就係咁, 我地坐係二樓, 對住街景, 慢慢享受我地0既豐富早餐啦~

較0岩時間, 大約十一點幾, 便於涉谷乘坐井之頭線到下北澤......
火車出奇地多人喎~~
不但有本地人, 也有一D本地老人團, 十分熱鬧~~~
可能時間尚早, 部分店舖仲未開門....
但唔開門都唔打緊, 店舖0既裝飾都係另一種視覺享受!!

因我地都唔係SHOPPING友, 所以在周圍行了一陣, 約兩個鐘後便離開~
*途中仲遇到有電視台拍野, 大部分都係搞笑明星, 但叫得出名只係得GORI一個.....*

沿著原路返回涉谷....其實當時都仲未知下一站要去邊.....
一出車站門口.....見到有一個巴士站......
而目的地係NHK喎......
我又醒起曾經CHECK過好似今日NHK有類似感謝日的宣傳, 可以免費入場~~
哈哈, 一於去NHK啦~
橫掂上次因時間關係去唔到, 今次終於有機會去探多磨啦~~

大約十五分鐘車程就到達NHK門口啦~
同時間亦有多架旅遊巴到達, 所以好多學生都一齊入場.....

未入場已經有好多多磨歡迎你....

仲出奇地仲遇見阿剛添~

當然仲要參觀一下多磨與兔叔的洞穴啦~

最後當然唔少得點都要鑿你一筆的精品店啦!!
好彩我都好理性地, 只係買左一個多磨鎖匙扣0者~

(其實係無咩好買...佢又無我最想要個個多磨鬧鐘............)
大約行了一小時左右, 我們就完成了NHK之旅!!

因由NHK其實可以步行前往原宿...而且唔太遠.....
橫掂未有下一步計劃, 所以我們決定先去原宿先再諗!!

路途不遠, 大約只需15-20分鐘左右...
途中還遇上了"國立競技場", 不知還有沒有機會可以在這裡與SMAP相會呢?

到達表參道, 再經過一座天橋便會到達明治神宮...
在天橋上, 我們竟然被一堆韓國旅客拉著問路(?)
見佢地不停地指手劃腳, 又拎本書比我睇, 我估到佢地應該係想去竹下通個邊....
我便用英文加上日文話比佢地知方向啦~
不知係佢地聽唔明呀定我講得唔清楚....
見佢地只係跟住我地行....
但因我地唔係去竹下通個邊嘛.....
所以去到原宿JR站便話比佢地知一直行就到啦~~
而佢地亦都好似知D唔知D咁向前行左去啦~

係香港都無咩機會比人問路...真估唔到去日本就遇到.....
我記得再對上次去日本, 我由竹下通行去表參道Johnny Shop方向....
又係比個嬸嬸截住, 問附近邊度有超級市場喎??
點知喎...........
所以最終我老點了嬸嬸去竹下通路口個間類似超市0既物體囉~

到達原宿已經差唔多四點幾, 而我地未食lunch, 所以簡單食左個鳥冬就算啦~

跟住我地去了kiddy land, 同tokyo hands一樣,
又係一個我未去過, 但又好多人話好多野睇同玩0既地方~

估唔到又真係幾好玩~
而且估唔到鬆弛熊係日本真係hit我咁緊要~~
差唔到成層都係佢地d產品~
好可愛, 但亦都好貴!!!
仲見到有一隻好似金毛尋回咁大0既機械狗....
識吠, 識sit, 識hand hand, 仲識得咬骨頭.....超可愛!!
呢度真係定力少d都會流血不止!!!!!哈哈!!!!!

我諗係kiddy land玩左兩個鐘都有.....
一出門口原來玩到天都黑齊啦!!!

橫掂都天黑啦~
我們即刻搭JR去新宿....估唔估到我地去邊呢??
就係近期香港人去東京必去食店之一 ~ 金太郎!!!!

雖然時值晚飯時間, 但舖頭出奇地少人喎.....
但我地都係選擇買番酒店慢慢嘆~
店內好多選擇.....三文魚, 吞拿魚, 帶子, 三文魚子, 甘蝦, 海膽等等...................

而我地0既選擇如下:

嘩~
雖然咁晚先買, 但出奇地十分新鮮!!!!
明副其實平靚正到爆!!!!
首先海膽, 超甜, 一D腥味都無, 同香港個D絕對無得比~
所以我係香港係唔會食海膽的!!
帶子又結實又甜美~
三文魚子又新鮮又夠脆!!!
吞拿魚雖然都新鮮, 係多左少少筋0者~~~~
一百蚊都唔駛, 夫復何求呢!!!

食飽飽~
我地又要執拾行李, 準備聽日轉飛去札幌繼續行程啦~

同場加映:
於下北澤一間小型遊戲機舖夾番來的鬆弛熊~

只需500yen三次~
第二次就已經夾到啦~
因出發前睇過一個日本節目教, 其中一招就係教將一邊夾插入招牌個條膠帶度,
咁就無論幾遠幾入都可以拉佢出黎~
我就係咁樣"隔硬"拉佢出黎~哈哈~

第三次轉攻另一隻大鬆弛熊....失敗!!
雖然未能一箭雙鵰, 但夾公仔就係咁討厭在呢度啦....
心想"玩多一次呀, 一定可以夾埋佢返屋企......"
果然再入多個500yen, 一樣徒勞無功~
即時決定唔再玩啦~

所以去親日本都唔鐘意(唔敢?)去夾公仔.....
我怕我會一晚"輸"哂所有旅費~^^